Që nga e hëna, karantina do të zbatohet për personat që hyjnë nga Britania e Madhe dhe Irlanda. Nga ana tjetër, obligimi i karantinës u hoq për personat që vijnë nga Kosova dhe San Marino
Nëse të hënën udhëtoni nga Mbretëria e Bashkuar ose Irlanda për në Zvicër, duhet të raportoni tek autoriteti përgjegjës kantonal brenda dy ditësh dhe të qëndroni në karantinë për dhjetë ditë. Zyra Federale e Shëndetit Publik (BAG) azhurnoi të premten listën e saj të karantinës, informon Shtegu.com. Në listën e vendeve me karantinë të detyrueshme gjithashtu janë Portugalia, Sllovenia, Hungaria, Danimarka dhe Islanda si dhe Belgjika, nga e hëna edhe Holanda dhe Luksemburgu. Në Francë, shtohet rajoni i Bretanjës, në Austri shtetet federale të Austrisë së Epërme dhe të Poshtme. Për herë të parë, BAG rendit gjithashtu një rajon në Itali: Detyrimi i karantinës prek Ligurinë.
Nga vendet jo europiane, Omani, Nepali, Maroku, Xhamajka dhe Ekuadori janë shtuar në listë. Nga ana tjetër, hiqet detyrimi i karantinës për udhëtarët nga Kosova: Detyrimi për të raportuar dhe karantinuar për ta vlen vetëm deri të dielën, nga e hëna nuk zbatohen kufizime. E njëjta gjë vlen edhe për San Marino.