Më 25.11.2024, nga ora 14:00 deri në 16:00, u zhvillua një ngjarje e veçantë për promovimin e librave, e organizuar në kuadër të festimeve për Ditën e Flamurit, në nder të 28 Nëntorit, Ditës së Pavarësisë së Shqipërisë
Programi i tubimit ishte i pasur dhe shumëngjyrësh, duke nisur me një pjesë teatrale-humoristike nga aktori i njohur Akademiku Mr. Dibran Fylli dhe aktorja Magbule Rrapaj, të cilët me interpretimin e tyre të shkrirë në humor, krijuan një atmosferë të ngrohtë e miqësore. Pjesa tjetër e programit përfshiu performanca muzikore klasike nga artisti i shquar Valon Imeri, i cili me talentin e tij të jashtëzakonshëm përcolli meloditë që preknin thellë shpirtrat e të pranishmëve.
Një moment shumë i rëndësishëm i tubimit ishte pjesëmarrja e Profesorëve Kristaq Shabani, Dr. Shefqet Dina dhe Dr. Hekuran Rrapa, të cilët ndanë refleksione mbi vlerën dhe rëndësinë e librave të promovuar, si dhe ndikimin e tyre në zhvillimin e shoqërisë shqiptare. Një nga momentet kulmore të ngjarjes ishte ndarja e çertifikatave -Membership Certificate – dhe dy tituj akademikë nga Akademia Shqiptaro-Amerikane e Shkencave dhe Kulturës së Nju Jorkut për dy personalitete të shquara: Miftar Tershnjakun -Akademik dhe Kolosin e mërgatës shqiptare në politikë, Asambleistin Setki Ibraimi-Akademik, i cili, përveç titullit „Akademik“, mori edhe çmimin tjetër, përfshirë titullin:Ambasador i Paqes. Ky vlerësim i veçantë është një shenjë e mirënjohjes për kontributet e tyre të jashtëzakonshme në fushat e shkencës, kulturës dhe politikës, si dhe angazhimin e palodhur për ruajtjen e identitetit dhe vlerave kombëtare. Setki Ibraimi, me një karrierë 15-vjeçare si politikan, është një figurë e shquar dhe një djalë i lavdishëm i kombit shqiptar, i njohur për kontributin e tij të paepur në forcimin e mardhënieve ndërkombëtare dhe mbrojtjen e interesave të shqiptarëve.
Në këtë ngjarje të paharrueshme, u interpretuan himni i Austrisë dhe himni kombëtar shqiptar, duke shtuar një dimension patriotik dhe simbolik. I gjithë tubimi shënoi një ditë të paharrueshme, duke theksuar rëndësinë e kulturës dhe edukatës për avancimin e shoqërisë shqiptare.
