Menaxheri i mesfushorit kosovar, Adnan Januzaj, Dirk de Vriese, ka mohuar se klienti i tij do të largohet nga skuadra e Manchester United. Ai të enjten në një intervistë dhënë „sportwitness.com“ ka thënë se Januzaj dëshiron të mbetet në Manchester United.
Madje ka thënë se dëshiron të bëhet edhe legjendë e klubit. Ditë më parë është raportuar se Januzaj 20-vjeçar do të transferohet te Real Sociedadi, transmeton Koha.net.
„Është e pakuptimtë. Adnani ndihet mirë në Manchester United. Në United gjithashtu nuk duan që ai të largohet, pasi konsiderohet si talenti më i madh prej shumë vjetësh. Ai do të qëndrojë në Manchester United për t’u bërë një legjendë në klub“, ka thënë De Vriese.
Reprezentuesi i Belgjikës me Manchester Unitedin ka kontratë deri në qershor të vitit 2018. Te Manchester Unitedi u transferua më 2011 nga të rinjtë e Anderlechtit.