Foto simbolike
17:37:45 2016-09-24
Me sa duket, pa kurrfarë arsye, një person i sëmurë psikisht nga Kosova ka therë me thikë një bashkatdhetar të vetin, në Bäumenheim të Gjermanisë.
Papritmas atij i duket shumë nxehtë. Sapo ishte plagosur me thikë në qafë duke pësuar një plagë tetë centimetra të thellë në qafë, viktima i hipë veturës dhe largohet rreth 800 metra deri te sheshi i Bäumenheimit, duke humbur vetëdijen nga gjakderdhja e madhe. „Çfarë ke bërë tani?“, e ka pyetur babai autorin e dyshuar të krimit. „Doja t`ia prisja kokën“, është përgjigjur autori, ka rrëfyer para trupit gjykues viktima, me një zë drithërues.
Rasti ka ndodhur nëntorin e vitit të kaluar, kur viktima 36-vjeçare kosovare e kishte vizituar një të njohur dhe duke u përshëndetur me te, sulmuesi e therë me thikë në qafë.
Edhe pse viktima pësoi plagë të madhe në qafë dhe humbi shumë gjak, ai kishte arritur të shpëtojë me veturë. Në rastin që viktima u transportua në spital, atij nuk i rrihte më pulsi dhe është dashur të reanimohet. Me ndihmën e një operacioni urgjent, ekipi mjekësor i Klinkës „Donau-Ries“ në Donauwörth, arriti ta shpëtojë kosovarin e plagosur.
Gjykata është duke u përpjekur të zbulojë motivet se çfarë e detyroi autorin të bëjë një vepër të tillë. Prokuroria dyshon se bëhet fjalë për një person skizofren, pasi gjatë mbajtjes në paraburgim, ai i kishte shkruar një letër në të cilin veprimin e tij e përshkruante si „reagim spontan, pasi ai ia kishte ngacmuar bashkëshorten dhe ia kishte rrëmbyer fëmijën e palindur“. Mjekëve u kishte thënë se ate është duke e ndjekur shërbimi sekret serb, i cili është duke ia kontrolluar mendimet e veta, ka deklaruar mjeku gjerman Gruber. Që atëherë, ai është duke marrë medikamente antipsikotike.
Sulmuesi i paskrupullt është rritur në Kosovë, ku deri në sulmin e forcave serbe në vitin 1999, ai kishte kryer shkollimin e mesëm. Gjatë luftës në Kosovë, ai ishte arratisur në Shqipëri, ku kishte vazhduar shkollimin duke filluar studimet në elektronikë dhe kimi, e të cilat nuk arriti t`i përfundojë. Tashmë nëntë vite ai është duke jetuar në Gjermani, ndërsa për herë të fundit ka punuar në një sipërmërrje me orar të caktuar.
Para Gjykatës, viktima kishte pohuar se sulmuesin e kishte takuar vetëm disa herë, por se me te nuk kishte pasur asnjëherë mosmarrëveshje. Mikja e tij e kishte konfirmuar këtë pohim të tij: „I dashuri im nuk ka pasur probleme me askend, ai nuk është njeri i tillë“.
Ngjarja i ka tronditur që të dy dhe ai nuk përmbahet të dënesë me lot në sy. „Fillimisht mendova se bëhet fjalë për ndonjë sulm terrorist apo diçka e ngjashme“, spjegon ai, fjalët ë të cilit i përcjellë „Augsburger Allgemeine Zeitung“, njofton „Shtegu.com“. Thjeshtë, ai nuk ka pasur kurrfarë arsye për një veprim të tillë.
Edhe sot e kësaj dite, kosovari 36-vjeçar është duke vuajtur nga dhimbjet, pagjumësia, shtypja e lartë e gjakut dhe aktualisht është nën trajtim mjekësor psikologjik. Tashmë e ka humbur besimin tek të gjithë njerëzit, por edhe frikësohet të dalë nga shtëpia, ka raportuar mbrojtësja e vet.
Deri në përfundim të procesit gjyqësor do të kalojnë edhe disa seanca gjyqësore. Po që se sulmuesi vlerësohet si i sëmurë psikik, ai nuk do të dënohet me burg, por do të trasnferohet për një kohë të gjatë në ndonjë klinikë psikiatrike.