Në një aksident komunikacioni në Zvicër humbë jetën tetovari 50-vjeçar (e plotësuar)

21:04:59                   2017-01-20

Në rrugën „Fehrenstrasse“ në Büsserach të Solothurnit të Zvicrës, pasditen e sotme ka humbur jetën një shtetas maqedonas. Siç shkruajnë mediet zvicerane, dy vetura janë përplasur njëra me tjetrën, me ç`rast një vozitës është lënduar rëndë, ndërsa bashkudhëtari i vet nuk u ka mbijetuar plagëve.

Gjatë mesditës së sotme (e premte), një shtetas 27-vjeçar maqedonas ka qenë duke qarkulluar me veturën e vet në rrugën „Fehrenstrasse“ në drejtim të fshatit Büsserach, njofton „Shtegu.com“. Në një kthesë të majtë, për shkaqe ende të panjohura, ai e humbë kontrollin mbi veturë. Sipas një komunikate të policisë zvicerane, ai ka rrëshqitur dhe ka dalur në anën e kundërt të rrugës, duke goditur një veturë tjetër të llojit „BMW“.

Shtetasi maqedonas dhe bashkudhëtari i vet janë ngujuar në veturë, ndërsa ekipi i zjarrfikësve ka intervenuar për t`i liruar. Për bashkudhëtarin 50-vjeçar, gjithashtu shtetas maqedonas, çdo ndihmë ka qenë joefikase, pasi ai ka ndërruar jetë në vendin e ngjarjes. Vozitësi maqedonas ka pësuar lëndime të rënda dhe me helikopter është dërguar në spitalin më të afërt. Vozitësi i BMW-së ka kaluar pa ndonjë lëndim.

Rruga „Fehrenstrasse“ është bllokuar për një kohë të gjatë.

E plotësuar:

Në aksidentin e rëndë që ka ndodhur sot në Zvicër ku jetën humbi një person 50 vjeç dhe një tjetër u plagos rëndë por jashtë rrezikut për jetën, janë dhënë detaje tjera rreth kësaj tragjedie .Në anën tjetër bëhet e ditur se të aksidentuarit janë nga Bogovina e Tetovës transmeton Faktiditor.ch.