17:16:43 2016-08-09
Për dëbimet e azilkërkuesve nga Ballkani, nuk ka ndonjë afat të caktuar kohor, por sipas autoriteteve të aeroportit në Mynih të Gjermanisë, brenda javës organizohet nga një fluturim çarter për azilkërkuesit e dëbuar, në drejtim të Tiranës, Shkupit apo Prishtinës.
Atmosfera gjatë dëbimit zakonisht është e qetë, por ka edhe raste kur në avion gjendet edhe ndonjë person i cili paraqet rrezik për tu vetëvrarë.
Një rast i ngjashëm ka ndodhur nga fundi i muajit korrik të këtij viti, me një familje pesanëtarëshe kosovare, gjatë fluturimit për në Prishtinë edhe përkundër faktit se një mjeke nga Ingosltadti, te nëna 32-vjeçare e kishte vërtetuar diagnozën e rëndë, e rrezikshme për tu vetëvrarë. Edhe një mjek tjetër ka dhënë një diagnozë të ngjashme, duke e këshilluar për një terapi mjekësore, shkruan „Sueddeutsche Zeitung“, njofton „Shtegu.com“. Por, autoriteteve të Bavarisë së Epërme nuk u ka lënë shumë përshtypje diagnoza në fjalë, duke e realizuar dëbimin e familjes kosovare, edhe pse në familje ka qenë e sëmurë edhe vajza e tyre pesëvjeçare.
Me këtë rast ka reaguar avokati i familjes, Franz Bethäuser i cili nga autoritetet përkatës kërkon që familja të kthehet në Gjermani. Kërkesa e tij është refuzuar nga qeveria lokale, me arsyetimin se gruaja ka qenë depresive që në vendlindjen e saj.