Familja Isai nga Prespa, rreze drite e shqiptarëve në SHBA

Ishte një periudhë e vështirë për shqiptarët anembanë trojeve të ish Jugosllavisë, kur gjithçka që ishte shqiptare mohohej nga diktatura e atëhershme komuniste. Shqiptarët ndiqeshin hap pas hapi, për t`u penguar në arsimimin dhe ruajtjen e identitetit kombëtar. Vallë, a ju kujtohen disa të rinj që vinin nga vise shumë të largëta për t`u arsimuar në kryeqendrën e Shkupit?! Vinin nga Struga, Dibra, Ohri e Prespa dhe vërtetë ishin për t`u lavdëruar në çdo aspekt të ruajtjes së identitetit të tyre kombëtar, pa marr parasysh presionin që ushtrohej mbi ta. A ju kujtohen „prespërët“ e këndshëm me të cilët ndonjëherë bënim shaka me gjuhën e tyre unike të dialektit toskë?!

Njëri nga ta ishte edhe Abduraman Isai, i lindur në fshatin Kranjë të rrethit të Prespës. Shkollën fillore e kreu në vendlindje, kurse të mesmen dhe të lartën, drejtimi histori-gjeografi në Shkup. Duke mos i përballuar këtij presioni dhe kushteve të rënda ekonomike që mbretëronin në Maqedoninë e atëhershme, në vitin 1985 Abduramani vendosi të emigrojë në SHBA ku dhe u njoftua me bashkëshorten e tij të ardhshme, po ashtu me prejardhje nga Kranji, ndërsa miqtë nga rrethina e Kumanovës. Vjehrri i tij ishte nga emigrantët e parë që u vendosën në shtetin amerikan që në vitin 1962. Në vitin 1987, njohja e tyre kurorëzohet me martesë, duke krijuar një familje të mrekullueshme me dy djem dhe një vajzë. Nazmiu është më i madhi dhe ka kryer Bachelorin në shkencat natyrore në Northern Illinois University por që menaxhon restorantin „Alpine View“. Më i riu Shpëtimi vazhdoi gjurmëve të vëllait, duke kryer Bachelorin në University of Iowa dhe Masterin në Business Administration MBA në Rockford University.

Abduramani menjëherë iu përvesh punës në sferën e gastronomisë, duke hapur restorantin „Sunrise“ që do të bëhej i famshëm në rrethinë. Njëherit, kjo hapësirë bëhet edhe qendër lidhëse gjatë luftës së Kosovës prej ku grumbulloheshin ndihmat për luftëtarët e lirisë, përcillej çdo ngjarje në vendlindje etj. Gjatë luftës në Kosovë prespanët u organizun shkëlqyeshëm dhe Prespa pranoi shumë refugjatë, njofton Shtegu.com. Në këtë periudhë të rëndë për shqiptarët, Abduramani u zgjodh arkëtar i fondit të shoqatës në Ilinois, për ndihmat që u dërguan në Prespë, për t`i përballuar fluksit të madh të refugjatëve nga Kosova.

Aktualisht, Abduramani është pronar i dy restoranteve „Alpine View Restorant“ dhe „Tavern On Clark“, të cilët janë lokale me renome dhe vizitohen nga emra të mëdhenj të jetës kulturore amerikane.

Në vitin 2017, vajza e tij Mirlinda e gjen fatin e jetës te një djalosh i zoti, me prejardhje po ashtu nga Kranji, i cili në SHBA kishte ardhur si fëmijë dyvjeçar, ndërsa është rritur në Detroit të Michiganit. Shkollën e mesme, Mirlinda e mbaroi në Belvidere High School, kurse Bachelorin e përfundoi në De Paul University në Chicago. Por, ajo nuk u ndal me kaq dhe vazhdoi shkollimin deri në përfundimin e Masterit, të cilin e kreu në University of Toledo Ohio dhe tani, në ditëlindjen e saj të 25-të, është pranuar në dy universitete prestigjioze: Në Central Michigan dhe University of Toledo dhe Mirlinda zgjodhi që mjekësinë ta vazhdojë në University of Toledo. Nga një vogëlushe e këndshme, tani shqiptarët në SHBA po pasurohen edhe me një eksperte në fushën e shkencave biologjike, falë edhe përkrahjes së bashkëshortit Ferzulla Elmazit. Urojmë që sukseset e Mirlindës dhe gjeneratës së re të shqiptarëve përtej Atlantikut të mos ndalen asnjëherë, duke u bërë ambasadorët më të mirë të popullir shqiptar, për të bërë shumë krenarë.