00:12:04 2016-03-13
Pyetja nëse familja shqiptare Bushgjokaj do të mund të qëndrojë edhe më tej në Medebach të Gjermanisë, mbetet e paqartë. Nga mesi i muajit shkurt, fëmija 21-muajsh kishte marrë urdhër për ta lëshuar territorin e Gjermanisë, ndërsa një javë më vonë edhe e gjithë familja kishte pranuar udhëra të ngjashëm. Kjo qasje e shtetit gjerman ndaj familjes shqiptare kishte tërhequr vëmendjen e opinionit të gjerë, pasi kërkesa e Edonës së vogël ishte refuzuar me arsyetim se pas lindjes së saj, pas arratisjes, ajo nuk është e përndjekur në vendlindje.
Gjatë kësaj jave, një gjykatës i Gjykatës kushtetuese gjermane e kishte mbështetur ndalimin e urdhërit për dëbim. Si pasojë e kësaj, autoritetet e emigracionit teoretikisht mund ta realizojnë dëbimin e familjes.
Për Gjykatën kushtetuese edhe më tej mbetet i paqartë urdhëri për dëbim. Gjatë kësaj duhet të shqyrtohet nëse frika e familjes Bushgjokaj nga një gjakmarrje e mundshme mund të shërbejë si arsyetim për të qëndruar familja, shkruan „Der Westen“, njofton „Shtegu.com“. Kërkesa e saj për qëndrim të rregullt ishte refuzuar edhe përpos frikës së saj nga gjakmarrja, pasi tashmë gjysmë viti, Shqipëria llogaritet si vend i sigurt i prejardhjes.
Nga ana tjetër, shoqatat e ndryshme qytetare gjermane janë duke u përpjekur që familja të fitojë të drejtën për të qëndruar në Gjermani, pasi që nga arritja e tyre në maj të vitit 2014, ata janë integruar plotësisht, duke u përkujdesur personalisht për mbijetesën e tyre.
Për familjen Bushgjokaj do të debatojë edhe komisioni për raste të rënda, i cili përbëhet nga anëtarë kishtarë, shoqatat bamirëse, agjenci qeveritare dhe ente mjekësore, ndërsa nuk është e lidhur me institucionet shtetërore. Përvoja e deritanishme ka dëshmuar se autoritetet gjermane zakonisht e përcjellin një procedurë të tillë.