Tiranë, 7 korrik – Ministri i angazhuar për Evropë dhe Punë të Jashtme, Gent Cakaj, kumtoi se Shqipëria nuk do të marrë pjesë në samitin e SEECP-së, organizuar nga Bosnja e Hercegovinës.
Në rrjetin social “Tuiter”, ai shkroi se trajtimi i organizuesve ndaj Kosovës është i papranueshëm, se është kundër synimit të krijohet atmosferë e besimit, marrëdhënieve të mira fqinjësore dhe stabilitetit. Cakaj shton më tej se nuk mund të ketë bashkëpunim pa trajtim të barabartë.
“Shqipëria e anulon pjesëmarrjen e vet në Samitin e SEECP-së në shenjë solidariteti me Kosovën. Trajtimi i saj nga ana e organizuesve është i papranueshëm dhe nuk është në drejtim të krijimit të atmosferës së besimit, marrëdhënieve të mira fqinjësore dhe stabilitetit. Qëndrojmë së bashku”, shkroi ministri shqiptar për Evropë dhe Punë të Jashtme, Gent Cakaj, i cili është nga Kosova.
Sipas mediumeve shqiptare, dje presidentit i Kosovës, Hashim Thaçi informoi se ka marrë ftesë të marrë pjesë në samit por me vërejtjen sqaruese para emrit të Kosovës, për dallim nga shtetet e tjera. Thaçi ka cekur se Kosova e ka refuzuar ftesën e tillë.
Samiti i Procesit për bashkëpunim në Evropën Juglindore (SEECP), me të cilin kryeson BeH, mbahet nesër dhe pasnesër në Sarajevë ndërsa do të marrin pjesë shefa të shteteve dhe qeverive të vendeve-pjesëmarrëse në Proces./KOHA