11:48:01 2017-10-25
Besniku dhe Eveline (emra të shpifur), një peshk i vogël dhe një shumë i vogël në trafikimin e lëndëve narkotike, janë gjendur para Gjykatës së rrethit në Lenzburg të Zvicrës. Vendimi i Gjykatës ka shkaktuar gëzim aq të madh te Besniku, sa që ai ka puthur avokatin e vet.
Skena jo të përditshme janë zhvilluar në Gjykatës e rrethit në Lenzburg: I akuzuari (dhe i shpallur si fajtor) i ka dhuruar puthje avokatit të vet dhe një puthje me dorë gjithë trupit gjykues dhe presidentes së Gjykatës, Eva Lüscher. Por, cfarë ka ndodhur? Besniku 30-vjeçar është dënuar me 22 muaj burg, 10 prej të cilëve pa kusht, shkruan „Aargauer Zeitung“, përcjellë „Shtegu.com“. Arsyeja për gëzimin e tij: Pjesën e burgimit pa kusht ai e ka vuajtur. Prokuroria ka kërkuar 30 muaj pa kusht.
Besniku ka kontrabanduar me lëndë narkotike, edhe pse ai para trupit gjykues nuk e ka pranuar një gjë të tillë. Por, prokurorja është mbështetur në deklaratat e dy femrave. Eveline ishte furnizuar nga Besniku me heroinë, ndërsa ajo është dënuar me 12 muaj burg me kusht dhe gjobë në të holla. Gruaja e dytë e cila e ka akuzuar Besnikun, është një bashkëbanuese e Eveline e cila ka pohuar se Besniku rregullisht e ka vizituar Eveline dhe i ka shitur heroinë.
Gjykata zvicerane e ka vlerësuar si të arsyeshëm dënimin prej 22 muaj burg, dhjetë prej të cilëve pa kusht, pasi Besniku më parë nuk ka qenë i dënuar. Dënimi do të duhej të kishte efekt parandalues, edhe pse prokurorja zvicerane ka pritur një „Gjykatë më të guximshme“. Si duket të gjithë u ndanë të kënaqur, duke i marrë parasysh shpenzimet e vogla gjyqësore, ndërsa më i lumtur me siguri se ka qenë Besniku. Një ditë pas përfundimit të procesit gjyqësor, ai i ka hipur avionit, është kthyer në Tiranë dhe për herë të parë e ka përqafuar të birin e vet të lindur në muajin maj të këtij viti. (Shtegu.com)