11:10:04 2017-01-28
Edhe pas gjashtë ditësh të zhdukjes së trembëdhjetëvjeçarit zviceran Silas Aerschmann, Policia kantonale e Friburgut nuk ka mundur të japë risi për ngjarjen.
„Ne po bazohemi në çdo informatë sado të vogël dhe po kërkojmë intensivisht në vazhdim““, ka deklaruar të premten zëdhënësi i policisë Bernard Vonlanthen, lidhur me zhdukjen e Silasit.
Vonlanthen i ka spjeguar mënyrat e kërkimit nëpër gjithe territorin ku supozohet se është zhdukur trembëdhjetëvjeçari, i cili këtë veprim e ndërmori pas një zënke me t`ëmën. Në këtë aksion janë përfshirë edhe helikopterët, ndërsa radiusi i kërkimit gjithnjë e më tepër po zgjerohet.
Për familjen e Silasit, situata është tepër e rëndë, ndërsa policia shpreson në një përfundim të mirë të situatës.
Edhe në shkollën ku Silas vijon mësimin është shkaktuar shqetësim i madh i cili vërehet tek nxënësit: „Të gjithë jemi duke shpresuar se Silasi do të gjendet së shpejti“, ka pohuar drejtori i shkollës Bernhard Schafer për „Berner Zeitung“, njofton „Shtegu.com“. Policia zvicerane i lutë të gjithë ata të cilët dinë ndonjë informatë për Silasin, të paraqiten në këtë numër telefoni: 026 304 17 17.
