Dënohet kosovari që torturoi peshqit

12:45:23              2016-07-16

Peshkimi i gabuar e ka sjellë një kosovar në Gjykatën e Lenzburgut në Zvicër, për shkak të „trajtimit pikëllues e torturues të peshqve“, me ç`rast ai është dënuar.

Terminin e parë të seancës gjyqësore, Petriti e kishte lëshuar për shkak të ngatërrimit të datës së mbajtjes, Por gjatë kësaj seance 28-vjeçari u paraqit duke u penduar dhe kërkoi falje për veprimin e tij.

Edhe në disa pikëpamje të tjera, kosovari me vendbanim në Freiamt, Gjykatës i kishte lënë përshtypje të mirë e kooperuese. Veprimet kundër Ligjit për mbrojtjen e kafshëve ai nuk i mohoi.

Prokuroria e rrethinës Lenzburg-Aarau e ka akuzuar për „trajtimin e shumëfishtë pikëllues e torturues të peshqve“, peshkimin joadekuat të tyre dhe peshkim pa leje përkatëse, shkruan „Aargauer Zeitung“, njofton „Shtegu.com“.

Petriti ka deklaruar se ai nuk ka qenë në dijeni për rregullat e peshkimit të cilat janë ndryshuar para dy vitesh, por se ka dashur vetëm të kalojë një ditë të mrekullueshme „duke u larë e notuar“.

Akuza e ka rënduar se 5-6 peshqit e zënë, ai i kishte mbajtur në një qese najlloni të mbushur me ujë, në gjendje gjysmë të gjallë. Gjykatësi i ka treguar Petritit një foto, duke i thënë: „Ju po e shihni se ky peshk nuk është duke u ndjerë mirë“. Por, Petriti nuk kishte llogaritur si duhet, duke pohuar: „Ashtu se ashtu, peshqit do të ngordhnin“, është përgjigjur kosovari i cili në Gjykatë është paraqitur pa ndonjë avokat. Pa e ditur se peshqit në këtë gjendje vuajnë, i kishte vendosur në qese najlloni.

Petriti është dënuar me 2.700 franga zvicerane me kusht për dy vite pasi nuk i ka njohur rregullat e peshkimit, ndërsa shumën prej 800 franga zvicerane do ta paguajë.