„Azzurët“ kafshatë e lehtë për FC Prishtinën

Ekipi shqiptar FC Prishtina nga Berna, nuk ka të ndalur në rrugën drejt inkuadrimit në Ligën e parë regjionale të Kantonit të Bernës. Në një ambient të mrekullueshëm, e të përkrahur nga tifozët e saj besnikë, paraditen e së dielës, ajo me plotë meritë fitoi ndeshjen si mysafire kundër ekipit FC Azzuri, me rezultat 6:3.

Golashënuesi më i mirë i ekipit: Bujar Mehmeti

Mysafirët shënuan dy gola duke avancuar me 2:0 me golat e Durim Seipit në minutën 17` dhe Bujar Mehmetit (24`), ndërsa nga fundi i pjesës së parë, „Azzurët“ arritën të zvogëlojnë rezultatin në 2:1. Fillimi i pjesës së dytë u takoi vendësve të cilët nga një pakujdesi e mbrojtjes së Prishtinës, e barazuan rezultatin në 2:2, ndërsa golashënues ishte Syart Bala. Por, paraprakisht, për shkak të dy kartonëve të verdhë, njëri nga lojtarët vendës ishte ndëshkuar me karton të kuq dhe pas kësaj gjithçka ishte e qartë. „Prishtinasit“ arritën të shënojnë katër gola me radhë, duke ngritur avantazhin në 6:2 dhe kur të gjithë prisnin fishkëllimën e fundit të gjyqtarit, vendësit e zvogëluan rezultatin në 6:3, që ishte edhe rezultati përfundimtar i takimit. Nga futbollistët shqiptarë, ndër më të dalluarit ishin si zakonisht Bujar Mehmeti (me dy gola të shënuar), Leutrim Rashiti (1), Durim Seipi (1), Hisham Emurli (1) Valdet Ramadani (1) i cili në lojë u aktivizua nga minuta 71`.

Një aksion i rrezikshëm para portës së kundërshtarit

Vlen të theksohet se takimi u zhvillua në një terren mjaft të papërshtatshëm dhe ajo që i irritoi tifozët dhe lojtarët e FC Prishtina, ishin gabimet e njëpasnjëshme të gjyqtarit anësor, i cili si duket nuk kishte shumë profeionalizëm në përcaktimin e lojtarëve në pozitë jashtë lojës, duke ndërprerë aksionet e mysafirëve në disa raste të dyshimta.

Ndarja e gëzimit të fitores me tifozët besnikë

Sidoqoftë, ekipi i FC Prishtina ka përforcuar pozitën e liderit në tabelë, duke u shkëputur katër pikë nga vendi i dytë.

Disa nga themeluesit e klubit dhe tifozë të pandashëm