Në muajin qershor, një zviceran kishte hapur zjarr në Bazel të Zvicrës, mbi dy shtetas verimaqedonas në rrugë, duke e plagosur njërin prej tyre. Tani, ai është arrestuar, shkruajnë mediat zvicerane, përcjell Shtegu.com.
Incidenti kishte ndodhur më 22 qershor, rreth orës 23.00 në rrugën Brombacherstrasse në Bazel. Sulmuesi i kishte përcjell nga prapa dy verimaqedonasit të moshës 29 dhe 25-vjeçare, duke hapur papritmas zjarr mbi ta, ka shkruar të enjten Prokuroria e Bazelit në deklaratën e saj.
Verimaqedonasi ishte plagosur në këmbë, sipas dëshmive të mëhershme dhe është dërguar në spital, ku i është nënshtruar një operacioni mjekësor. Shoqëruesi i tij më i ri kaloi pa ndonjë lëndim.
Përderisa sulmuesi fillimisht ishte arratisur, të dielën ai është arrestuar nga Policia e Bazelit në Münchenstein. Bëhet fjalë për shtetas zviceran të moshës 31-vjeçare, ka njoftuar prokuroria, transmeton Shtegu.com.
Mëtutje thuhet se i dyshuari e njeh viktimën. Por motivi i sulmit mbetet ende i paqartë dhe do të hetohet nga policia për krime të rënda. Aktualisht, i dyshuari gjendet në paraburgim.