Në Shkup janë vendosur tabela në disa monumente historike, por ajo që ka zgjuar kurreshtjen është tabela e vendosur tek përmendorja e Aleksandrit të Madh, ku shkruhet:
“Për nder të Aleksandrit të Madh, figurë historike, që i përket historisë dhe qytetërimit antik helen dhe trashëgimisë kulturore dhe historike botërore. Këtu është paraqitur si luftëtar në kalë”.
Tabela të këtilla janë vendosur edhe tek Olimpia dhe Filipi i Dytë, raporton TV21, ndërsa ato janë në përputhje me Marrëveshjen e Prespës, e cila rregullon edhe kontestet historike me palën greke, që kanë të bëjnë me përmirësimin e disa mbishkrimeve nëpër monumentet dhe objektet e vjetra historike. Ndërsa nga disa institucione janë hequr simbolet e “Verginës”, por edhe flamuri që është përdorur me këtë simbol.
Historiani shqiptar Skender Asani thotë për TV21 se këto veprime janë skandaloze sidomos tek përmendoret e Aleksandrit të Madh, dhe Filipit të Dytë. Sipas tij, në këtë mënyrë po shtrembërohen faktet historiografike.
“Maqedonia Antike ka qenë në përbërje iliro-thrake. Këtë e dëshmojnë të gjithë autorët e vjetër por edhe historianët e mëvonshëm. Unë jam i bindur që shumë shpejt do të demantohet kjo politikë, që po bëhet me vënien e kësaj pllake, duke shtrembëruar historinë. Unë si historian bëj apel te Qeveria që sa më shpejt të hiqet kjo pllakë që është një sajesë tjetër historike. Duke i ikur një problemi krijohen probleme tjera brenda shtetit”, thotë historiani, Skender Asani.
Tabelat e reja janë të vendosura nga Qyteti i Shkupit, edhe ate në tre gjuhë, maqedonisht, shqip dhe anglisht./INA