Aksident tragjik: Kamioni me rimorkio e godet për vdekje një vogëlush dhjetëvjeçar në Zvicër

17:16:34                   2019-06-06

Në Moosleerau të Kantonit Aargaut, mesditën e së enjtes ka ndodhur një aksident i rëndë. Pak pas orës 12:00, një dhjetëvjeçar është godit nga një kamion dhe pësoi plagë të rënda.

Pasditen e së enjtes, në korsinë e biçikletave në rrugën „Luzernerstrasse“ në Moosleerau AG, ka ndodhur një aksident tragjik. Dy nxënës u përplasën me biçikletat e tyre në afërsi të restorantit „Sonne“. Njëri nga fëmijët, një djalosh dhjetëvjeçar, u rrëzua në tokë dhe u godit nga një kamion me rimorkio.
Në vendngjarje erdhën menjëherë shërbimet emergjente. „Në orën 12.20 është ulur një helikopter shpëtimi i ambulancës ajrore Alpine në parkingun e restorantit“, thotë një dëshmitar okular për „Blick“, informon Shtegu.com.

Mjekët kujdestarë, me të gjitha forcat kanë tentuar ta reanimojnë djaloshin e lënduar rëndë. „Ata me siguri për gjysmë ore janë përpjekur për ta ringjallur atë“, thotë një banore vendas (64) për „Blick“.

Megjithatë, përpjekjet e ringjalljes mbetën të pasuksesshme. Siç konfirmon Policia Kantonale e Aargaut, djaloshi dhjetëvjeçar zviceran vdiq në vendin e aksidentit. Fëmija i dytë kaloi pa lëndime.

Pas aksidentit, kamioni fillimisht vazhdoi rrugën. Prandaj, policia filloi kërkimet për vozitësin. Vetëm pas dy orë kërkimesh, vozitësi u zbulua, ndërsa bëhet fjalë për një vozitës 43-vjeçar zviceran. Më pas, ai u pyet për aksidentin dhe ndaj tij u urdhërua kontrolli i gjakut dhe urinës.

Për shkak të aksidentit, Luzernerstrasse ka qenë e mbyllur deri pak pas orës 16:00.