20:21:35 2017-11-26
Pas një zënke në një lokal në rrugën „Schlachthausgasse“ në Vjenë-Landstrasse, një shtetas 48-vjeçar kosovar ka pësuar lëndime të rënda, pas sulmit që i është bërë me dalta të hekurta.
Mbrëmjen e së shtunës rreth orës 18.00, në një lokal në Vjenë-Landstrasse, viktima 48-vjeçare ishte zënë me dy persona, shkruan „Heute“, përcjellë „Shtegu.com“.
Sipas deklaratave të njërit nga sulmuesit, kosovari 48-vjeçar nga ai kishte kërkuar të holla. Por, kosovari e mohon një gjë të tillë. Dyshohet se paraprakisht, personat nuk ishin njohur me njëri-tjetrin. Zënka vazhdoi edhe jashtë lokalit, në rrugën „Schlachthausgasse“ ku ajo eskaloi edhe më shumë.
Pas një debati të shkurtër, sulmuesit, një shqiptar 41-vjeçar dhe një serb 34-vjeçar, nga valixhet e tyre nxorrën dalta të hekurta dhe filluan ta godasin kosovarin 48-vjeçar.
Ai pësoi plagë të rëndë në kokë, por jo të rrezikshme për jetë dhe menjëherë është dërguar në spitalin më të afërt. Që të dy sulmuesit janë arrestuar, ndërsa u janë konfiskuar daltat e hekurta. (Shtegu.com)