11:35:53 2017-06-17
Shqiptari Avni Orllati ka pranuar që të japë një intervistë të gjatë, njëherit edhe e para e tij për opinionin, të cilën e ka publikuar gazeta frankofone zvicerane „Le Temps“. Sipërmarrja e tij ka një hyrje-dalje prej 200 milionë frangash zvicerane dhe më se 700 të punësuar në Zvicrën frankofone.
Kulminacioni i arritjeve në biznes, ka shkaktuar reagim qëllimkeq në mesin e konkurrentëve dhe përmes letrave anonime, sipërmarrja e Avniut është paditur në gjyq, për shkak të kinse ndotjes së ambinetit jetësor. Por, pas disa muajsh të hetimeve, Prokuroria e Kantonit Vaud e ka mbyllur hetimin, duke e kualifikuar informatën anonime si të pabazë.
Për momentin, Avniu ka nën mbikëqyrje rreth 79 deri 90 kantiere, ndërsa që nga fillimi i karrierës i ka përfunduar rreth 1 mijë sosh. Të gjitha këto, ai i ka arritur me punë, fat dhe guxim të pashoq, duke u ballfaquar me lloj-lloj rreziku, shprehet Avniu në intervistën e gjatë të cilën e ka përshtatur „Shtegu.com“. Tash e 25 vite, Avniu në ora 05.00 të mëngjesit shkon në zyrë, ndërsa pasdite i viziton kantieret. Në një pyetje të gazetarit zviceran, nëse e njehë Hashim Thaqin, ai është përgjigjur se i njehë vetëm politikanët e Zvicrës, sidomos ata të Kantonit Vaud.
Në të ardhmen ai ka pohuar se do të punojë në realizimin e disa projekteve për godina të reja. Ll. S.