09:53:23 2016-03-23
Fat të jashtzakonshëm në fatkeqësi kanë pasur kosovari 21-vjeçar dhe bashkudhëtarja e tij, gjatë një aksidenti të shkaktuar nga vetë vozitësi, në Zürich-Schwamendingen të Zvicrës: Vetura e tij është rrokullisur, duke u përmbysur mbrapshtë në kulm dhe është shkatërruar tërësisht. Për fat të mirë, që të dy udhëtarët kanë pësuar vetëm lëndime të lehta.
Sipas informatave të policisë zvicerane, natën e fundjavës që lamë pas, vozitësi e kishte humbur kontrollin mbi veturë, duke dalë nga rruga. Dy dëshmitarë të aksidentit i kishin nxjerrë të lënduarit menjëherë nga vetura e përmbysur, që më pas të dërgohen për kontroll mjekësor në spitalin më të afërt.
Shkaqet e aksidentit do të ndriçohen, ndërsa policia dyshon në tejkalimin e shpejtësisë, shkruan „Aargauer Zeitung“, njofton „Shtegu.com“. Vozitësit të ri kosovar, menjëherë i është konfiskuar patentë shoferi.