Kosovari që qëlloi mbi veturën e kushëririt të tij në Spreitenbach, në vitin 2016, duhet të qëndrojë pas hekurave për shtatë vite e gjysmë. Paraprakisht, Gjykata e Rrethit në Baden atë e kishte dënuar me gjashtë vite burg.
Ai kurrë nuk kishte menduar ta vriste kushëririn e tij, Liridonin. «Doja ta trembja. Më në fund desha t’i qëroja hesapet“, i tha Kushtrimi Gjykatës Supreme. Një natë marsi të vitit 2016, një mosmarrëveshje e gjatë mes dy kushërinjve në Spreitenbach u përshkallëzua. Kushtrimi u përpoq të ballafaqohej me kushëririn e tij, kur ai refuzoi të dilte nga vetura dhe nuk e mori seriozisht zënkën, atëherë ai gjuajti tre të shtëna në veturën e Liridonit. Pak kohë më vonë në Bareggtunnel, Mercedesi mori flakë pasi njëri prej plumbave e kishte goditur elektronikën e veturës. Liridoni vrapoi në këmbë nëpër tunel dhe Kushtrimi e ndiqte. Një skenë si nëpër filma, shkruan „Aargauer Zeitung“, përcjell Shtegu.com.
Sidoqoftë, kryetari i gjykatës nuk ishte në gjendje të bindej me arsyen e Kushtrimit për shkrepjen e të shtënave mbi veturën e kushëririt. Trupi gjykues e gjeti fajtor për tentativë vrasjeje të premten dhe e dënoi me 7.5 vite burg. Kështu, ata e konfirmuan vendimin e Gjykatës së Rrethit në Baden, por edhe ia rritën dënimin. Gjykata e ultë e kishte dënuar Kushtrimin me gjashtë vite burg.
Liridon, i cili konsiderohet viktimë dhe paditës privat nga shkëmbimi i zjarrit, kësaj radhe nuk ishte i pranishëm në gjyq.