Shkolla e Thunit e cila ia ndaloi një vajzës shqiptare nga Maqedonia mbajtjen e shamisë në shkollë, do të bëjë një përjashtim individuel. Përderisa të sillet një vendim i Gjykatës federale, secili rast do të shqyrtohet individualisht, shkruajnë mediet zvicerane.
Por, rregullorja e shkollës, e cila ndalon mbajtjen e kapelave dhe mbulesave të tjera të kokës, përsëri do të mbetet në fuqi dhe nuk do të ndryshojë, thuhet në një komunikatë të qytetit të Thunit të lëshuar gjatë të hënës.
Rastin e nxënëses së klasës së nëntë, gjatë fundjavës e bëri publik gazeta „Sonntagszeitung“, ndërsa pas bisedës me nxënësen, prindin dhe përfaqësuesit e shkollës, u gjetë një zgjidhje e përkohshme, njofton „Shtegu.com“.
Babai i vajzës është dashur të shkruajë një kërkesë me shkrim, të ciliën e ka dorëzuar gjatë fundjavës. Në këtë kërkesë shkruhet se vajza me dëshirën dhe bindjen e saj kishte vendosur për mbajtjen e shamisë.
Të hënën janë takuar autoritetet përkatëse të qytetit të Thunit, si dhe përfaqësues të ndryshëm përgjegjës për këtë rast. Kantoni i Bernës nuk ka rregullore të posaçme për veshmbathje nëpër shkolla, por në një udhëzues thuhet se komisioni i shkollës mund të vendosë kufizimin e veshmbathjes, po të është e nevojshme kufizimi i rregullave religjioze.