18:03:07 2019-02-19
Deri më tani, rrugën e saj prej stacionit të autobusit në Berlin-Marzahn, në një largësi dhjetë minutash në këmbë, Shaimaa A. (16) e ka ecur e vetmuar për çdo ditë. Pas shkollës, takimi me shoqet apo ndonjë shëtitje nëpër qytet, shkruajnë mediat gjermane, përcjell Shtegu.com. Tani, refugjatja nga Siria nuk dëshiron të ecë kurrë e vetmuar.
Vajza e refugjatëve sirianë pohon: „Një i panjohur më ka sulmuar atje me një shishe birre, sepse isha e mbuluar me shami“.
Të premten, më 8 shkurt 2019, nxënësja ishte duke u kthyer në shtëpi me një shoqe (15). Shaimaa A: „Një person i madh dhe i trashë erdhi për të na takuar, ishte rreth 25 vjeçar“. Kur vajzat u përpoqën ta devijojnë takimin me te, ka ndodhur sulmi. Shaimaa: „Ai bërtiti: `Shajze ausllander! Hiqe shaminë dhe largohu nga vendi im'“.
Kur sulmuesi e pa vajzën se po përpiqej të telefononte, ai ia hodhi telefonin në dysheme. „Ai më goditi në fytyrë me pëllëmbën e dorës. Pastaj me grushtin e tij dhe me një shishe birrë në kokë. Isha pa ndjenja. Pas kësaj, sulmuesi u arratis“.
Në spital shkoi me tronditje. Babai i saj paraqiti një ankesë në polici, informon më tej Shtegu.com. Shaimaa A: „Gjithmonë ndjehesha e sigurt në Gjermani, edhe pse shpesh isha fyer për shkak të shamisë në kokë. Por kjo ishte me të vërtetë e tmerrshme“.
Që nga viti 2012 ajo banon në Gjermani dhe ka një status të pranuar të azilit. Ajo vijon shkollën e mesme dhe dëshiron të bëhet mjeke. Për vetveten thotë: „Kur shpërtheu lufta, një hallë e jona e solli vëllain tim dhe mua përmes bashkimit familjar. Ne kemi ardhur me avion. Që atëherë e mbuloja kokën me shami. Në mënyrë vullnetare“.
Tre vite më vonë, prindërit e saj dhe të dy motrat (21, 22 vjeçare) udhëtuan nëpërmjet rrugës ballkanike në Berlin, përcjell Shtegu.com. Që atëherë familja jeton në Marzahn.
Shaimaa A.: „Gjithmonë ndjehesha rehat në lagje. Por tani nuk dua të jetoj më këtu“. Babai i saj nuk dëshiron ta lëjë të ecë e vetmuar. Prej tani do ta shoqërojë për çdo ditë në stacionin e autobusëve.