Zvicra dëbon kosovarin e papërmirësueshëm pas 40 vitesh qëndrim

Një person nga Kosova gjithnjë e më tepër kishte rënë në konflikt me Ligjin zviceran. Tani Gjykata Federale zvicerane ka vendosur që t`i tërhiqet lejeqëndrimi.

Në Zvicër ai është duke banuar për gati 40 vite, ku kishte ardhur nga Kosova si pesëvjeçar me nënën dhe motrën e tij. Tani, kosovari që së shpejti do të bëhet baba i dyfishtë, do të duhet të ë kthehet në vendlindje. Arsyeja: Ai shumë shpeshë kishte rënë në konflikt me Ligjin zviceran.

Ndër të tjera, kosovari kishte marr pjesë në vjedhjen e skelave me vlerë prej rreth 230,000 frangash zvicerane dhe pajisje shtëpiake të vjedhura në Zvicër, i shiste në Kosovë. Përveç kësaj, ai ishte i përfshirë edhe në tregtinë e 53 kilogramëve marihuanë, siç shkruan „Aargauer Zeitung“, informon Shtegu.com.

Gjykata rajonale në Baden, në prill të vitit 2005 e dënoi kosovarin me pesë muaj e gjysmë dhe në gusht 2014 me katër vite e nëntë muaj burg. Gjykata e Lartë në Aargau ia rriti dënimin e fundit me një vit. Kosovari më së shpejti mund të lirohet në vitin 2021, por më pas duhet të largohet nga Zvicra – pasi kështu ka vendosur zyra e migracionit në Aargau.

I dënuari nuk dëshironte ta pranonte këtë dhe pasi kishte dështuar me ankesën e tij në Departamentin Kantonal të Ekonomisë dhe Çështjeve të Brendshme dhe Gjykatën Administrative Aargau, iu drejtua Gjykatës Federale. Por edhe ky veprim nuk e ndihmoi. Gjykata Federale konfirmoi dëbimin e kosovarit, duke ia tërhequr lejeqëndrimin e rregullt.

Arsyeja: Gjykatësit janë të mendimit se ekziston rreziku i përsëritjes së veprave që është në kundërshtim me interesin publik. Për më tepër, as paralajmërimet dhe as dënimi i parë me burg nuk e ndaluan atë nga krime të mëtejshme. „Ankuesi nuk ishte në gjendje t’i shfrytëzonte mundësitë e ofruara në mënyrë të përsëritur dhe nuk i merrte seriozisht paralajmërimet e ndryshme. Ai tani duhet të përballet me pasojat „, thuhet në aktgjykim.