Si i harxhojmë paratë e mërgimtarëve ?

09:07:19 2016-07-01

Kontributi ekonomik i diasporës është një shtyllë e rëndësishme e zhvillimit të cilit një numër i madh shtetesh në botë i kushtojnë rëndësi të veçantë për shkak se e nxisin procesin e regjenerimit social e ekonomik.

Paratë e mërgimtarëve shqiptarë që hyjnë në vend janë leva kryesore lëvizëse e ekonomisë. Paratë e harxhuara për konsum të përgjithshëm, ndikojnë në përmirësimin e të hyrave në buxhet, por dilema është e hapur se sa këto mjete, përmes projekteve të ndryshme, iu kthehen atyre që i investojnë në formë të harxhimeve.

Mërgimtarët shqiptarë të cilët janë të angazhuar me punë të përkohshme apo të përhershme jashtë vendit, me kapitalin e tyre që derdhin në Maqedoni në masë të madhe ndikojnë në ekonomi dhe njëherit janë edhe stabilizator kryesor i rezervave devizore.

Sipas, profesorit Nasir Selimit, investimet direkte nga diaspora kapin shifrën 1 miliard e 400 milionë dollarë që do të thotë se ndonjë vit arrijnë 20 për qind të Bruto Produktit Vendor. Këto mjete financiare e mbajnë gjallë ekonominë e vendit. Institucionet shtetërore nuk kanë bërë shumë për të informuar afaristët nga diaspora se ku të investojnë gjegjësisht të jenë pjesëmarrës në blerje të ndryshme të cilat i emitojnë institucionet tona.

Ndërkohë, partitë politike shqiptare në Maqedoni në platformat e tyre kanë edhe sferën e ekonomisë, por deri më tani nuk kanë arritur t’i vendosin në binar këto mjetet financiare që vijnë nga diaspora. /V. D. / (tetova1.mk)