18:25:43 2016-11-17
Një shqiptar 52-vjeçar nga Zvicra, ka dashur ta dërgojë pasurinë e vet në Maqedoni. Por, fati nuk e shoqëroi shumë kohë.
Policisë zvicerane i kishte rënë në sy një veturë e llojit „Ford“, mbrëmjen e së mërkurës në autostradën A4 në Schwyz, shkruajnë mediet zvicerane, njofton „Shtegu.com“. Që në shikim të parë ka qenë e qartë se vetura në fjalë ka qenë e ngarkuar më tepër se sa është e lejuar. Brendësia e saj ka qenë e stërmubushur me gjësende, por edhe bagazhi mbi veturë është stërmubushur me pajisje amvisërie.
Peshorja i ka vërtetuar dyshimet e policisë, pasi vetura ka qenë e ngarkuar për 700 kg më tepër se limiti.
Vozitësi është shqiptar 52-vjeçar nga Maqedonia me vendbanim në Zvicër. „Sa i përket ngarkesës, bëhet fjalë për gjësende të amvisërisë, të cilat ai ka dashur t`i dërgojë në vendlindje“, ka deklaruar zëdhënësi i policisë David Mynall për „blick“.
Por, stacioni fundit i shqiptarit ka qenë Zvicra. Atij nuk i është lejuar të vazhdojë më tej, ndërsa është dashur të deponojë një shumë të caktuar të hollash për gjobë. Shqiptari nga Maqedonia do të duhet të përgjigjet para Prokurorisë shtetërore.