Ministria e Brendshme ka ngritur procedurë hetimi ndaj një inspektori policor në rajonin e Tetovës, nën dyshimin se ka qenë pjesë e skemës së narko-trafikantëve. Javën e kaluar u arrestuan dy persona në fshatin Kamjan të Tetovës, ku në veturën që po e ngisnin u gjet një sasi e konsiderueshme e drogës. Dyshohet se veturën që po e ngisnin ka qenë e inspektorit në fjalë. Alsat mëson jozyrtarisht se inspektori në polici ka deklaruar se veturën e ka shitur shumë kohë më parë. Me rastin tani po merret kontrolli i brendshëm i MPB-së ndërsa detaje të tjera pritet të jepen me përfundimin e hetimeve. Për këtë rast kanë reaguar edhe partitë shqiptare në opozitë. Aleanca për Shqiptarët thotë se inspektori i dyshuar është i afërt me funksionarët e BDI-së dhe se për këtë qëllim i njëjti nuk është përfshirë në hetim me kohë.Automjeti me të cilin është bërë shitja nuk është mbajtur për ekzaminimet e mëtutjeshme. Kjo është brengosëse pasi që automjeti ka qenë ne shfrytëzim të inspektorit i cili në fakt është vëllai i funksionarit te lartë të BDI-së. Ky funksionar ka qenë shef kabineti në Komunën e Gostivarit kur kryetar ishte Nevzat Bejta, ka qenë shefi i shtabit të BDI-së në Gostivar, ka qenë përfaqësues i BDI-së në KKZ. Si mundet qe i gjithë ky rast te përfundon vetëm me mbajtjen e, siç u theksua në mediume, të dy shitësve, pa mos vazhduar më tutje dhe hetuar rastin se cili ka qenë roli i inspektorit si dhe njerëzve te tjerë? – thonë nga Aleanca për Shqiptarët.
Lëvizjes Besa akuzon MPB-në se duke dashur të mbrojë inspektorin, nuk e ka mbajtur për ekzaminim veturën me të cilën janë kapur trafikantët e arrestuar, e në të cilën është gjetur drogë.
Javët e fundit në rajonin e Pollogut policia ka forcuar kontrollet anti-droge ndërsa numri i të ndaluarve për posedim dhe trafikim të lëndëve narkotike ka shkuar mbi 20, përfshi këtu edhe ish-punonjës dhe punonjës të policisë.
/Alsat-M/