Për shkak të rritjes së papunësisë nga kriza e koronavirusit, Unioni në Bundestag dëshiron të frenojë imigrimin e mëtejshëm të punëtorëve të pakualifikuar nga Ballkani Perëndimor. Sipas „Welt am Sonntag“ („WamS“), grupet e punës të fraksionit të CDU/CSU ranë dakord të zgjasin rregulloren, e cila në të vërtetë skadoi në fund të vitit, për dy vite të tjerë dhe nga ky grup lejojnë vetëm 15,000 persona që të hyjnë në vend.
Zëdhënësi i brendshëm i Unionit në Bundestag, Mathias Middelberg, si justifikim i ka thënë gazetës në fjalë: „Jemi në një rënie masive ekonomike dhe tashmë kemi 600,000 të papunë më shumë se një vit më parë. Në një situatë të tillë, nuk është opsion që rregullorja e Ballkanit Perëndimor thjesht duhet të vazhdojë të rrjedhë e pandryshuar“, informon Shtegu.com.
Ministria Federale e Punës e drejtuar nga SPD-ja informoi „WamS“ se edhe pa kontroll, menaxhimi i bazuar në nevoja të imigracionit është i mundur, sepse Agjencia Federale e Punësimit pranon vetëm punësimin „nëse nuk ka punëkërkues të privilegjuar të vendit ose BE-së“ (i ashtuquajturi kontroll përparësor).
Rregullorja e Ballkanit Perëndimor u prezantua pothuajse pesë vite më parë. Ajo mundëson që punëtorët e pakualifikuar nga Shqipëria, Bosnje-Hercegovina, Kosova, Maqedonia e Veriut, Mali i Zi dhe Serbia të emigrojnë legalisht nëse kanë një ofertë pune gjermane. Vitin e kaluar, sipas raportit, erdhën 27,000 punëtorë.
Në krizën e pandemisë së koronavirusit, numri i të huajve të papunë është rritur ndjeshëm me 24 për qind nga muaji mars në 840,000, sipas të dhënave nga Agjensia Federale, e cila është në dispozicion te gazeta.