09:29:57 2019-08-06
Këngëtares shqiptare Xhevahire Bytyqi, nuk i lejohet të performojë në Opfikon të Zvucrës. Ky nuk është një rast i vetëm, thotë një organizator i prekur.
Ahengje të mëdha me muzikantë kosovarë janë organizuar nga qiramarrësi Ramadan Millaku (49), në restorantin e tij Glatthof në Opfikon ZH. Edhe këngëtarja Xhevahire Bytyqi, është dashur të interpretojë gjatë këtij viti në sallën e madhe, shkruan „20 Minuten“, përcjell Shtegu.com. Por, Zyra e Migracionit në Cyrih nuk ia lejoi vizën. Arsyeja: Ajo e ka klasifikuar këngëtaren si „jo shumë të kualifikuar“.
Ky nuk është një rast i vetëm, thotë Millaku. Që prej majit 2018 ai nuk mund të ofrojë më muzikë live në sallën e madhe. Ai nuk arriti të angazhojë artistë nga Kosova. „Askush nga më shumë se 40 artistë shqiptarë të kërkuar nuk mund të performojë këtu“, thotë 49-vjeçari. Shembuj janë Remzi Leka apo Ymer Bajrami.
Kjo e ka rrëqethur Millakun. „Përse nuk mund ta dëgjojmë muzikën shqiptare këtu?“, pyet ai. Mysafirët e tij nuk do ta kuptonin këtë. „Bytyqi, për shembull, nuk njihet vetëm në Kosovë, por edhe në Zvicër, ku edhe më parë ka performuar. Tani, papritmas, kjo nuk është më e mundur“. Ai gjithashtu e gjykon të padrejtë që Kosova dhe Shqipëria nuk trajtohen njësoj si shtetet e BE-së. „Për artistët nga Bullgaria, për shembull, një leje mund të merret brenda 24 orësh“.
Vendimi ka një ndikim të madh në biznesin e tij: „Unë jetoj nga këto ahzengje“. Përveç kësaj, Zvicra përfiton nga kjo sepse ai ia paguan tatimet. Në gjysmën e parë të vitit 2018, për shembull, për shkak të angazhimeve, ai pagoi rreth 1800 franga zvicerane për tatim. Millaku nuk ka pasur vështirësi financiare – ndryshe nga kolegët e tij profesionalë.