Profesoresha Domi: Shqipëria dhe Maqedonia e Veriut asnjëherë nuk do të hynë në BE

20:37:56                   2019-06-18

Tanya Domi, një profesoreshë në Universitetin e Kolumbisë, pohon se Holanda do të vazhdojë të bllokojë përgjithmonë vendet e Ballkanit Perëndimor në rrugën e tyre për në BE.

Vendet e Ballkanit Perëndimor kurrë nuk do të hyjnë në Bashkimin Europian, sepse Holanda do të bllokojë vazhdimisht pranimin e tyre me veton e saj.
Këtë e pohon Tanya Domi, një profesoreshë në Universitetin e Kolumbisë, e cila beson se Holanda nuk do ta braktisë qëndrimin e saj të vështirë për zgjerimin e BE-së, kur është fjala për vendet e Ballkanit Perëndimor.

Ajo konsideron se kërkesa për përshpejtimin e integrimit europian të vendeve të Ballkanit Perëndimor, që i kanë dërguar Bullgaria, Republika Çeke, Estonia, Letonia, Lituania, Hungaria, Italia, Malta, Austria, Kroacia, Sllovenia, Polonia dhe Sllovakia është një përpjekje për të zbutur goditjen që Franca dhe Holanda i dhanë idesë së zgjerimit me qëndrimin e tyre ndaj fillimit të bisedimeve të pranimit të Maqedonisë së Veriut dhe Shqipërisë.

„Nëse opsionet e zgjerimit përkeqësohen, veçanërisht për Maqedoninë e Veriut, kjo nuk do të ishte mirë për BE-në, shkruajnë mediat e huaja, përcjell Shtegu.com. Pa dyshim, cinizmi ndaj BE-së nga ana e vendeve kandidate potenciale, me siguri do të thellohet në qoftë se Maqedonia e Veriut nuk përfshihet në procesin e anëtarësimit sa më shpejt që të jetë e mundur“, ka pohuar Domi, duke shtuar se Brukseli duhet të ballfaqohet me realitetin në Ballkan.

„Kina, Turqia, Rusia dhe shtetet e Gjirit janë të angazhuara me forca të buta dhe të forta, ndërsa BE-ja nuk është më i vetmi lojtar në rajon. Unë mendoj se vakumi është krijuar nga dobësimi i Britanisë së Madhe me Brexit-in dhe tërheqjen e vazhdueshme të Shteteve të Bashkuara, dhe tani ka një ndikim negativ në rajon, në drejtim të ndërtimit të demokracisë. Asnjë nga rivalët e tjerë gjeopolitikë, nuk është i njohur se e mbështetë fuqishëm demokracinë. Për më tepër, ato dominohen nga qeveritë neoliberale“, tha Domi, me vërejtjen se Holanda do të vazhdojë të vërë veton mbi çështjen e zgjerimit të BE.