Ishte një lajm i mrekullueshëm i asfaltimit të disa fshatrave në rrethinën e Tetovës dhe padysim se është bërë një hap i madh për lehtësimin e qarkullimit të banorëve të këtyre anëve. Mirëpo, Maqedonia e Veriut edhe më tej i mban veshët e shurdhër kur është në pyetje përmirësimi i infrastrukturës në Karshiakë të Shkupit ku disa fshatra rrezikohen të zhduken nga harta gjeografike për shkak të neglizhencës së shtetit ndaj popullatës shqiptare të kësaj ane.
Ajo që brengos më së shumti është fakti se mediat sikur janë pajtuar me plogështinë e partive shqiptare për të gjallëruar jetën në këtë anë dhe nuk i japin hapësirë e jehonë të mjaftueshme pasivitetit partiak për të bërë trysni ndaj shtetit që të ndryshohet sadopak situata e mjerë. Si duket, dikujt po i konvenon nxitja e rinisë shqiptare për të emigruar jashtë vendit, për t`i boshatisur fshatrat shqiptarë. /Shtegu.com/
