Maqedoni, s’ka përparim për ligjin e Prokurorisë

Ministrja e Drejtësisë Renata Deskoska deklaroi se ka konsultime joformale midis grupeve të punës të pozitës dhe opozitës për ligjin për prokurori publike, por ende nuk ka takim zyrtar për tejkalimin e dallimeve. Deskoska konfirmoi se nuk ka zhvendosje të pozicioneve dhe se ende ka mospajtime me opozitën për ato që është biseduar në prokurorinë publike për krimin e organizuar dhe korrupsionin në takimet me liderët midis Zoran Zaveit dhe Hristijan Mickoskit. “Për sjelljen e ligjeve nevojiten 80 vota, që në këtë moment Qeveria nuk i ka. Kompromisi i cili do të nënkuptojë shkeljen e standardeve dhe parimeve evropiane dhe kompromis për sjelljen e një ligji më të keq nga ai aktual nuk është diçka që nga Bashkimi Evropian do të pranohet pozitivisht “, tha Deskoska duke iu përgjigjur pyetjes së gazetarëve në pres-konferencën me rastin e hyrjes në fuqi të Ligjit për ndihmë juridike falas. Kryeministri Zaev para disa ditëve në Nju-Jork deklaroi se pret që pozita dhe opozita t’i harmonizojnë qëndrimet e tyre dhe ta miratojnë ligjin për prokurori publike para takimit të Këshillit Evropian, dhe se nevojitet një takim i ri me Mickoskin që kjo çështje të mbyllet.