Paris, 20 gusht – Presidenti francez Emanuel Makron pas takimit me homologun e tij rus Vladimir Putin në Breganson, tha se është i bindur se ardhmëria e Rusisë lidhet për Evropën.
“Jam i bindur se ardhmëria e Rusisë në tërësi është e lidhur me Evropën. Besojmë në Evropë e cila është e zgjeruar nga Lisbona deri në Vlladivostok”, ka shkruar Makron në Tuiter.
Ai shtoi se me Putinin kanë biseduar për zjarret pyjore në Sibir dhe shkrirjen e premafrostit në këtë rajon.
“Rusia po ballafaqohet me pasoja shkatërruese nga ndryshimet klimatike. Më vjen mirë që vendosi ta fillojë ratifikimin e Marrëveshjes klimatike të Parisit, që është veprim simbolik dhe duhet ta ndjekim këtë rrugë”, tha Makron.
Mediat ruse shtojnë se liderët e të dy vendeve kanë shprehur përkushtim për vendosjen e stabilitetit afatgjatë në Libi dhe kthimin e rendit në vend.
Rreth situatës në Siri Makron ka potencuar nevojën për ndërprerje urgjente të zjarrit në provincën Idlib, në pajtim me marrëveshjen e arritur në takimin në Soçi, më 17 shtator të vitit 2018.
Takimi i të dy presidentëve, që u mbajt mbrëmë, ka zgjatur më shumë se 2,5 orë, kumtoi shërbimi për media e presidentit rus./koha