23:41:38 2019-06-22
Kërçovari i njohur me pseudonimin El Cheka (Sheqerim Ahmeti) tani disa javë me radhë, nga Amerika po publikon biseda të përgjuara për udhëheqësit e Bashkimit Demokratik për Integrim. Në incizimin e fundit, ai ka publikuar bisedën mes kryetarit të BDI-së, Ali Ahmeti dhe nënkryetarit të kësaj partie, Sadulla Duraku. Ata bisedojnë lidhur me sugjerimet që kanë marrë nga Bujari (mediumet në Shkup shkruajnë se bëhet fjalë për zv/kryeministrin për eurointegrime, Bujar Osmani, i cili pas ketij skandali sot ka dhënë dorëheqje), që të intervenohet te kryetari i Gjykatës së Kumanovës të mos dënohet vrasesi i vëllait të gazetarit Isen Saliu, por një person tjetër.
Edhe pse në bisedën e publikuar Ahmeti dhe Duraku, shprehen kundër ndryshimit të aktakuzës, megjithatë burime në gjykatën e Kumanovës kanë thënë për disa portale kosovare se pikërisht falë afërsisë së vrasësit me BDI-në, ai asnjëherë nuk është dënuar për këtë vepër. Sipas tyre, kjo lë vend për të dyshuar se jashtë bisedave telefonike, krerët e BDI-së “duke përfshirë ndoshta edhe Ahmetin e Durakun” janë angazhuar për shpëtimin e kriminelit.
Lidhur me këtë skandal, ka reaguar edhe shkrimtari i njohur nga Maqedonia, Kim Mehmeti. Ai fton qytetarët në protesta masive kundër BDI-së, të cilët i quan kriminelë.
““E dëgjuat bisedën telefonike që tregon si vrasësit e vëllait të një gazetari, kërkojnë nga funksionarë dhe nga kryetari i BDI’së që në vend të tyre të fajësohet dikush që nuk e ka kryer vrasjen? Ju shkon ndërmend të pyesni veten nga kjo afërsi e drejtuesve të BDI’së me vrasës të njerëzve të pafajshëm? Pastaj, e kuptoni tani pse drejtuesit e BDI’së aq nguteshin të miratohej ligji ndëshkues për ata që do i publikojnë ‘bombat’, e që do i shpalosnin fytyrat kriminele të disa drejtuesve të lartë të kësaj partie? Sidoqoftë, ka ardhur çasti kur duhet ta dëshmojmë vetëdijen kolektive, kur duhet të ngremë zërin kundër kriminelëve të BDI’së, e të cilët, votën shqiptare e përdorën për të shkelur mbi kufomat tona. Andaj mos heshtni, sepse i barabartë me vrasësit dhe kriminelët, është edhe ai që shtiret se as sheh, as dëgjon gjë. Le t’i mbrojmë edhe gjithë ata që i shpalosin këto të vërteta dhe le ta paralajmërojmë Qeverinë e Maqedonisë se nuk do lejojmë ta burgosë e dënojë të vërtetën dhe pafajësinë, vetëm që t’i mbrojë kriminelët e BDI-së!”, apelon Mehmeti. (Kumanova1)