Lule dhe qirinj janë të vendosur para një garazhi privat në Langenthal të Zvicrës. Dhjetëra të rinj qëndrojnë përpara, duke përkujtuar shokët e tyre Volkanin (20) dhe Fitimin 19-vjeçar (emri i njohur për redaksinë). Të dy të rinjtë, mbrëmjen e së mërkurës e humbën jetën në Langenthal. Në këtë qytet të Zvicrës është duke u mbajtur zi, shokët e viktimave janë të shokuar.
Mbrëmjen e së mërkurës, policisë zvicerane i kishte arritur një informatë se dy persona ishin gjetur në një garazh pa shenja jete. Ekipet e shpëtimit kanë mundur ta konstatojnë vetëm vdekjen e dy të rinjve, thuhet në një komunikatë të policisë zvicerane, njofton „Shtegu.com“. „Lajmin e pranova nga mediet, por se çfarë ka ndodhur saktë, si duket nuk e di askush“, ka deklaruar një banor i rrethit.
Por, fakt është se të dy të rinjtë: Njëri me shtetësi turke e tjetri me shtetësi shqiptare, janë gjetur pa shenja jete në rrugën Mittelstrasse. Shokët e tyre janë në kërkim të spjegimeve dhe rrethanave për vdekjen e tyre. Përmes „20 Minuten“, një shoqe e tyre ka deklaruar: „Është shumë tragjike që të dy të rinjtë të vdesin në këtë moshë“. Që të dy kanë qenë duke vijuar shkollën, njëri si praktikant i polimekanizmit, ndërsa Fitimi shkollën e tregtisë.
Nuk kanë të ndalur thashethemet lidhur me vdekjen misterioze të dy të rinjve, ndërsa njëri nga shokët e tyre ka deklaruar: Ata shpeshë janë tubuar në garazh, unë mendoj se ata kanë dashur të ngrohen në veturë, duke lënë motorin e ndezur“. Ai supozon se të rinjtë janë helmuar nga monoksid karboni, pasi rezervuari i veturës ka qenë i zbrazur, pasi të rinjtë ishin gjetur të vdekur.
Nga ana tjetër, policia ende nuk ka dalë me të dhëna zyrtare për shkakun e vdekjes së të rinjve: „Është ende shumë herët dhe për momentin nuk mund të themi asgjë“, ka deklaruar zëdhënësi, Nicolas Kessler. Sipas njohurive të deritanishme, një krim i mundshëm mund të përjashtohet, pasi tek viktimat nuk janë gjetur shenja dhune. Të vdekurit ende nuk janë identifikuar formalisht, por ekzistojnë indikacione të qarta për identitetin e tyre.
Dhimbja për humbjen e dy të rinjve është e madhe në Facebook. Shumica e përdoruesve të këtij rrjeti janë mbështjellur me zi. Një apel për tu takuar te vendi i ngjarjes është duke bërë xhiro: Në ora 20.00 të së enjtes ftohen të gjithë që të përkujtohen të rinjtë.
Mbrëmjen e së enjtes, rreth orës 20.00, në garazhin në të cilin humbën jetën dy të rinjtë, janë tubuar shumë persona të cilët me lot në sy i përkujtuan ata. Në mesin e tyre ishin edhe dy këshilltarët nacionalë zvicerane, kryetarja e Konfederatës helvetike, Simonetta Sommaruga dhe Johann Schneider-Ammann, ndërsa redaksia e „Shtegu.com“ ka siguruar foto nga vendi i ngajrjes.