Futbollistët e rinj shqiptarë nuk lejohen të argëtohen në lokalet e Zvicrës

06:56:26             2016-09-13

Në një lokal të St. Gallenit në Zvicër, disa futbollistë të rinj shqiptarë kanë dashur të argëtohen, por shefi i lokalit ua ka mbyllur derën. „Gjithnjë e më tepër po e përjetoj se si të huajt e integruar mirë nuk lejohen të hyjnë nëpër lokale“, ka pohuar taksisti shqiptar nga St. Galleni, Besnik Ziba.

Ai e njehë jetën e natës këtu shumë mirë, pasi për çdo fundjavë i dërgon klientët e tij nëpër lokale të ndryshëm. Gjatë kësaj të enjte, ai përjetoi momentin se si tre klientë të tij, futbollistë të rinj shqiptarë nga Zvicra Lindore, nuk u lejuan të hyjnë në lokalin „Elephant-Club“. „Edhe ate, pa ndonjë arsye“, pohon Ziba me një nervozizëm të madh. Me këtë rast, të rinjtë u dëshpëruan shumë.

„Ata nuk bërë ndonjë problem, por besoj se vetëm fakti që janë shqiptarë nuk janë lejuar të hyjnë brenda. Kohë të gjatë jam duke e vëzhguar situatën dhe jam bindur se personat nga Ballkani nuk janë të dëshiruar nëpër lokale të St. Gallenit“, ka deklaruar Besniku.

Futbollistët shqiptarë u dëshpëruan në masë të madhe: „Ne nuk ishim të dehur, kishim qëndrim të denje dhe rrobet tona iu përshtatnin rregulllave të jetës së natës, por shefi i klubit nuk na lejoi të hyjmë brenda“, shkruan „20 Minuten“, njofton „Shtegu.com“. Në pyetjen se përse ai nuk i ka lejuar në lokal, nuk ka pasur ndonjë përgjigje të veçantë. „Ai rregullisht vetëm ka përsëritur – Jo“.

Nga ana tjetër, lokali në fjalë është habitur nga akuzat e futbollistëve, pasi që 12 persona prej rreth pesëdhjetë të punësuarve në lokal, janë me prejardhje shqiptare. Ata iu përmbahen rregullave të lokalit dhe rasti në fjalë nuk iu është i njohur.

Besnik Ziba është i mendimit se lokalet duhet të punojnë sikur ai personalisht. „Në taksinë time unë i marrë të gjithë njerëzit dhe nuk kam kurrfarë problemi. Jemi duke jetuar në Zvicër dhe këtu njerëzit nuk mund të përjashtohen për shkak të prejardhjes së tyre“, përfundon Besniku.