Edhe një botim i Shkëlzen Halimit

29.01.2020

Shtëpia botuese Logos-A lexuesit shqiptar i sjell edhe librin “MANIPULIMI I EMOCIONIT APO TRANZICIONI (SHQIPTAR) NË LABIRINT”, të shkrimtarit dhe publicistit nga Shkupi, Shkëlzen Halimi.

Libri i lartpërmendur trajton periudhën post-komuniste apo periudhën e tranzicionit në të cilën kaloi shoqëria shqiptare në Republikën e Maqedonisë (tanimë të Veriut). Nëpërmjet këtij libri publicistik, autori e njofton lexuesin me amullinë politike që ka pllakosur shoqërinë dhe politikën shqiptare në Maqedoninë e Veriut. Në veçanti, autori prek edhe çështjet më të dhimbshme që, me apo pa vetëdije i përjetoi shoqëria shqiptare, siç është manipulimi me emocionin e individi, i cili akoma beson se ndryshimi është i mundur dhe se përfundimisht, ndonëse pas tre dekadave, do të ndahemi nga kthetrat komuniste. Po kështu, autori përqendrohet edhe te keqpërdorimi i pushtetit në dobi të grupeve të interesit, me ç’rast në sipërfaqe dalin shantazhi, frika, manipulimi, abuzimi me besimin e kështu me radhë. Bëhet fjalë për një libër që duhet dhe ia vlen të lexohet.