Arrestohet i dyshuari për vrasjen e boshnjakut dhe plagosjen e birit të tij në Austri

23:14:10                       2019-06-24

Vrasësi i dyshuar nga Salzburg-Lehen është arrestuar: Shqiptari i kërkuar me urdhërarrest ndërkombëtar e europian, është arrestuar të shtunën në Düsseldorf të Gjermanisë. Sipas një zëdhënësi të policisë së Düsseldorfit, shqiptari 31-vjeçar ishte arrestuar pas një kontrolli rutinë në një bar. Për momentin, ai gjendet në paraburgim për ekstradim.

Me prejardhje nga Tirana, shqiptari me nofkën „Klodi“, dyshohet se mbrëmjen e 4 qershorit, në Salzburg të Austrisë ka vrarë një boshnjak 46-vjeçar dhe ka plagosur rëndë birin e tij 24-vjeçar. Arma e krimit është gjetur disa ditë më vonë nga një kalimtar në afërsi, shkruajnë mediat austriake, përcjell Shtegu.com. 31-vjeçari nuk ka bërë rezistencë gjatë arrestimit të tij në fundjavë.

Të hënën, policia nuk ka dashur të komentojë mbi motivin e mundshëm të veprës, për arsye të hetimeve të mëtutjeshme.

Roli i një shqiptari tjetër të arrestuar 34-vjeçar, i cili u arrestua më 14 qershor në lidhje me krimin dhe që atëherë është mbajtur në paraburgim, mbetet i paqartë. Kundër tij po hetohet për veoër kontribuese për vrasjen dhe vrasje në tentativë. Por, ai i ka hedhur poshtë të gjitha akuzat.