Në Wangen pranë Oltenit, persona të panjohur ndezën fishekzjarrë në drejtim të xhamisë lokale dhe gjuajtën me gurë fasadën gjatë natës së së shtunës. Një xham i dritares është dëmtuar
Natën e së shtunës, pak pas orës 03.00 të mëngjesit, persona aktualisht të panjohur kanë ndezur fishekzjarrë në drejtim të xhamisë në Industriestrasse në Wangen pranë Oltenit dhe kanë gjuajtur me gurë fasadën. Këtë e ka bërë të ditur Policia Kantonale e Solothurnit, transmeton portali Shtegu.
Një xham i dritares është goditur dhe dëmtuar. Sipas gjetjeve fillestare, dyshohet se autorët të jenë të rinj të cilët kanë mundur të arratisen pa u zbuluar para se të vinte policia. Policia ka nisur hetimet për identifikimin e autorëve dhe është në kërkim të dëshmitarëve në lidhje me këtë.
Kushdo që mund të japë informacion në lidhje me incidentin ose identitetin e personave përgjegjës për dëmin, kërkohet të kontaktojë Policinë Kantonale të Solothurnit në 032 627 81 17.