Në kërkim urgjent shqiptari 40-vjeçar me histori të gjatë për veprat penale të drogës, grabitje dhe tentativë vrasjeje. Burri thuhet se të dielën ka vrarë një ukrainas 46-vjeçar pa adresë fikse në qytetin verior italian të Saronno. Policia italiane tani beson se vrasësi ka kaluar kufirin për në Zvicër menjëherë pas krimit, përpara se të identifikohej
Autoritetet hetimore italiane janë të sigurta se autori dhe viktima nuk njiheshin me njëri-tjetrin. Hetuesit besojnë se një debat i parëndësishëm e ka shtyrë shqiptarin e dhunshëm të nxjerrë armën që mbante dhe ta vrasë viktimën me dy të shtëna në gjoks.
A është ai në Tiçino?
Vrasësi u identifikua duke përdorur kamerat e një sistemi video survejimi. Me ndihmën e regjistrimeve të mëtejshme nga kamerat e vëzhgimit, karabinierët tani po përpiqen të rindërtojnë rrugën e tij të arratisjes. Siç raporton “Tio Online”, 40-vjeçari në këto momente ka të ngjarë të jetë në Kantonin e Tiçinos, transmeton portali Shtegu.
Siç raporton portali italian “Malpensa”, edhe shqiptari konsiderohet i pastrehë. Ai thuhet se ka jetuar pjesërisht në Cairate në një ndërtesë të braktisur dhe të rrënuar. Ai e përdori vendin si „vend strehimi“. Megjithatë, kur policia kontrolloi ndërtesën të hënën, burri nuk ishte më i pranishëm.