Ai goditi një këmbësor dhe u arratis. Pak më vonë, policia gjermane arrestoi shkaktarin e aksidentit.
Në Bremen të Gjermanisë, një person 60-vjeçar është goditur nga një veturë, mbrëmjen e së martës dhe u lëndua rëndë. Rreth orës 20:50, disa dëshmitarë raportuan se një xhip Audi kishte goditur një person pranë stacionit kryesor të trenit. Pas kësaj, vozitësi 23-vjeçar u arratis me veturën e tij, njoftoi policia gjermane, transmeton Shtegu.com.
Sapo arritën në vendngjarje, policët filluan me reanimimin e të lënduarit. Ata u mbështetën nga një mjek, i cili kishte ndodhur në afërsi të vendngjarjes. Më pas, një ambulancë e dërgoi këmbësorin në një spital, ku pas pak ai vdiq nga plagët e tij.
Pak më vonë, vozitësi dhe bashkudhëtari i tij 33-vjeçar u ndaluan nga policia dhe u dërguan në stacionin policor. Në xhipin e llojit Audi Q5, policia gjeti dëme masive në zonën e përparme dhe një xham të thyer.
Shqiptari 23-vjeçar kishte një vlerë alkooli prej mbi 0,5 promila. Në Gjermani, ai nuk ka vendbanim të përhershëm dhe është arrestuar, ndërsa po shqyrtohet masa e paraburgimit. Ai po hetohet për vrasje nga pakujdesia. Pas përfundimit të masave policore, bashkudhëtari i tij u la i lirë.
Hetuesit ia konfiskuan veturën dhe patentë shoferin, ndërsa dëmi i shkaktuar material është rreth 10,000 euro. Hetimet e mëtejshme për rrjedhën e aksidentit janë duke vazhduar. Policia në Bremen do të pranojë informacionin e dëshmitarëve përmes telefonit në 0421 362-14850.
Për shkak të aksidentit, në mbrëmje ka pasur vonesa masive të trafikut rreth rrugës „Ausser der Schleifmühle“.