Shqiptarët edhe me një magjistër të shkencave ekonomike. Të lumtë Mr. Bekri Ajdini

Situata ekonomike në Maqedoni, investimet e huaja, hapja e vendeve të reja të punës, ishin sërish në fokusin e debatit, por kësaj radhe gjatë prezantimit të studimit shkencor, mbrojtjes së temës së magjistraturës: “Struktura institucionale dhe instrumentet e diplomacisë ekonomike të Republikës së Maqedonisë”, nga tanimë magjistri i shkencave ekonomike, Bekri Ajdini. Në këtë mbrojtje publike u fol rreth strukturës aktuale të funksionimit të diplomacisë ekonomike në Maqedoni, ku u theksua se përkundër disa përpjekjeve elementare, nevojitet një strategji më e detjizuar për një veprim më efikas në të ardhmen. Mënyra e funksionimit të deritanishëm çalon në koordinimin mes institucioneve dhe shpeshherë ka dyfishim të detyrave dhe përplasje të interesave mes institucioneve. Në kuadër të instrumenteve që i përdorë Maqedonia për ta realizuar diplomacinë ekonomike, u theksua se përdoren metoda adekuate me të cilat bëhet një prezantim më dinjitoz i shtetit, mundësive e kapaciteteve që i ofron Maqedonia. Përkundër kësaj, u shtrua nevoja për avancim të këtyre instrumenteve, zvogëlim të shpenzimeve që shpeshherë janë të panevojshme për realizimin e aktiviteve të diplomacisë ekonomike si dhe profesionalizimin e kuadrit që është i angazhuar me këto problematika. Në punimin shkencor të Bekri Ajdinit, që u mbrojt të ejten para komisionit të kryesuar nga mentori prof.dr. Silvana Mojsoska në Institutin Ekonomik në Shkup, u konkludua se stabiliteti i brendshëm politik, vizioni qartë i definuar për të ardhmen e shtetit në rrugën e integrimeve euroatlantike, zbatimi i principeve të demokracisë dhe të një ekonomi të tregut të lirë, janë faktorët kyç që ndikojnë drejpërsëdrejti në thithjen e investitorëve të huaj, promovimin e produkteve jashtë Maqedonisë si dhe në përgjithësi ndikojnë në ndërtimin e një imazhi të përgjithshëm pozitiv të shtetit.