09:59:58 2016-09-22
Në datën 17 shtator 2016, në qytetin Andenne, Ambasada e Republikës së Shqipërisë në Belgjikë, në bashkëpunim me Komunën e Andennes dhe shoqatat shqiptare organizuan një eveniment në përkujtim të 60-vjetorit të mbërritjes në Belgjikë të emigrantëve të parë nga Shqipëria.
Aktivitetin e përshëndetën ambasadorja Suela Janina, Kryetari i Komunës së Andennes z. Claude Eerdekens, ministrja e Çështjeve Sociale e Provincës së Valonisë zj. Eliane Tillieux, deputeti Amet Gjanaj, një prej iniciatorëve të aktivitetit z. Safet Kryemadhi, përfaqësues të Caritas, si dhe përfaqësuesi i familjeve të emigrantëve të parë shqiptarë z. Pjetër Kukaj. Në vijim, grupi artistik ‚Vatra‘ dha një shfaqje me këngë e valle shqiptare.
Gjatë aktivitetit u vlerësuan sakrificat dhe kontributi i emigracionit shqiptar në Belgjikë dhe u shpreh mirënjohje për mikpritjen nga komuniteti i Ardennes dhe populli belg.
Këtij manifestimi i ka kushtuar rëndësi edhe e përditshmja belge „L`Avenir“ e cila ka vlerësuar lartë kontributin e shqiptarëve në Belgjikë, njofton „Shtegu.com“.
