KUJDES: Paralajmërim nga policia zvicerane për bashkatdhetarët që fluturojnë për pushime në vendlindje

16:05:45                 2019-04-18

Para kontrollit të sigurisë në aeroport, nuk duhet përdorur krem ​​duarsh, pasi shumë shpejt mund të bëheni terrorist i dyshuar.

Në fundjavën e ardhshme të Pashkëve, në aeroportin e Cyrihut përsëri pritet një turmë e madhe udhëtarësh. Me këtë rast, spitali i qytetit Triemli paralajmëron kundër përdorimit të kremrave për duar përpara kontrollit të sigurisë, shkruan „20 Minuten“, përcjell Shtegu.com. Arsyeja: Shumë produkte të zakonshme të kujdesit personal përdorin glicerinën si një freskues natyral.

„Kjo është e ngjashme me nitroglicerinën që përdoret për prodhim eksplozivi dhe gjatë kontrollit të sigurisë, mund të aktivizojë alarm“, thotë Stephan Lautenschläger, kryemjek i klinikës dermatologjike. Ai ishte i njohur me një rast të një shoqëruese fluturimi, e cila ishte testuar pozitiv për eksploziv, si pjesë e një kontrolli të rastësishëm, për shkak të glicerinës në kremin e saj të dorës.

Në Policinë Kantonale të Cyrihut është konfirmuar se produktet kozmetike mund të shkaktojnë një alarm me glicerinë: „Sidomos kur ndokush sapo ka lyer duart me krem, sistemi i alarmit aktivizohet menjëherë“, thotë zëdhënësi Ralph Hirt, informon Shtegu.com. Gjatë fazave intensive të udhëtimit nga Cyrihu, një alarm i rremë ndodhë deri shtatë herë në ditë.

Megjithatë, sipas Hirt, aeroporti është i pajisur në mënyrë të atillë që të vlerësojë shpejt nëse alarmi është shkaktuar nga kremi i duarve apo diçka tjetër. „Vonesa për këto alarme të rreme është shumë e vogël. Deri më tani asnjë pasagjer nuk e ka humbur ndonjë fluturim“.

Një krem me glicerinë për ta marr me vete, në përgjithësi është e lejuar, për aq kohë sa përmbajtja nuk është më e madhe se 100 mililitra, si për të gjitha lëngjet në bagazhet e dorës. „Megjithatë, ne këshillojmë që të mos përdoret kozmetikë e tillë pak para kontrollit të sigurisë“.